E reja 28-vjeçare tentoi të vriste gjyshen e bashkëshortit

Prokuroria Themelore Publike në Shkup ka hapur procedurë hetimore ndaj një 28-vjeçareje e dyshuar për veprën penale Vrasje në tentativë, sipas Kodit Penal.

Ngjarja ka ndodhur më 15 gusht, në shtëpinë në rrugën “Boris Bojadzhiski”, gjatë një rasti dhune në familje. E dyshuara ka tentuar ta mbytë gjyshen e bashkëshortit të saj, me të cilën jetonin në të njëjtin banim.

Sipas hetimeve, ndërsa e moshuara e lindur më 1938 po pushonte në një nga dhomat, 28-vjeçarja ka hyrë brenda, ka mbyllur derën, i është ulur sipër dhe i ka vendosur një jastëk mbi kokë me qëllim që ta mbytë. Ajo e ka shtypur me jastëkun dhe e ka goditur me grushta në kokë, duke menduar më pas se e kishte vrarë. Këtë ia ka treguar bashkëshortit, i cili menjëherë ka njoftuar policinë.

E moshuara është dërguar në spital, ku mjekët kanë konstatuar dëmtime në kokë, nofull dhe hematoma.

Prokuroria i ka propozuar gjykatësit të procedurës paraprake pranë Gjykatës Themelore Penale Shkup që të caktojë masën e paraburgimit për të dyshuarën, meqë ekziston rreziku real që ajo ta përsërisë ose ta përfundojë veprën e nisur.