Venera Azizi: Hap historik kundër bixhozit, Qeveria me masa të rrepta për mbrojtjen e të rinjve
Qeveria ka miratuar sot tekstin e ri të harmonizuar të Propozim-ligjit për lojërat e fatit dhe lojërat zbavitëse, i cili do t’i dërgohet Kuvendit për procedurë të mëtejshme. Zëdhënësja e Qeverisë, Venera Azizi, tha se me këtë ligj institucionet po hyjnë në një fazë të re në luftën kundër bixhozit ilegal dhe mbrojtjen e të rinjve.
“Me këtë po fillojmë një fazë të re, më serioze dhe vendimtare në luftën kundër organizimit ilegal të lojërave të fatit, reklamimit agresiv dhe keqpërdorimeve që për vite me radhë kanë shkaktuar dëm ndaj qytetarëve, veçanërisht ndaj të rinjve, fëmijëve dhe familjeve. Fokusi i këtij ligji është i qartë – mbrojtja e fëmijëve, brezave të rinj dhe familjeve”, deklaroi Azizi.
Ajo theksoi se për herë të parë vendosen kufizime të rrepta për reklamimin e lojërave të fatit, me qëllim që bixhozi të mos paraqitet si mënyrë jetese apo rrugë drejt suksesit.
“Ndalohet reklamimi jashtë hapësirave afariste nëse ai ka për qëllim nxitjen e qytetarëve për të marrë pjesë në lojëra të fatit. Ndalohet përdorimi i mesazheve që bixhozin e paraqesin si rrugë drejt suksesit financiar, jetës më të mirë apo si zgjidhje për problemet personale dhe sociale. Po ashtu, ndalohet reklamimi përmes personazheve publike dhe përmbajtjeve të orientuara drejt të miturve. Po dërgojmë një mesazh të qartë se bixhozi nuk guxon të normalizohet dhe as të paraqitet si stil jetese para të rinjve”, u shpreh Azizi.
Një nga ndryshimet kryesore të ligjit ka të bëjë me distancën e objekteve të lojërave të fatit nga institucionet arsimore. Sipas propozimit, kazinotë, klubet e automatëve dhe objektet me lojëra elektronike do të duhet të jenë të vendosura të paktën 500 metra larg shkollave fillore dhe të mesme.
“Ky është vendim institucional për t’i mbrojtur fëmijët nga ekspozimi i përditshëm ndaj bixhozit dhe varësive. Në bastoret që ndodhen brenda një rrezeje prej 500 metrash nga shkollat nuk do të lejohet vendosja e terminaleve elektronike video-lotari dhe pajisjeve të tjera për lojëra elektronike të fatit”, tha ajo.
Azizi njoftoi gjithashtu se institucionet tashmë kanë ndërmarrë masa konkrete kundër bixhozit ilegal online.
“Deri më tani janë mbyllur 358 platforma ilegale të huaja online që kanë organizuar në mënyrë të paligjshme lojëra të fatit në territorin e shtetit. Bëhet fjalë për platforma që kanë funksionuar pa licencë, pa kontroll dhe pa asnjë mbrojtje për qytetarët. Pavarësisht përpjekjeve të vazhdueshme të organizatorëve ilegalë për të hapur kanale dhe faqe të reja interneti, institucionet do të vazhdojnë me kontrolle të shtuara dhe masa përkatëse ligjore”, deklaroi Azizi.
Në fund, ajo theksoi se qëllimi i Qeverisë është krijimi i një sistemi të kontrolluar dhe më të sigurt për qytetarët.
“Kjo Qeveri që nga dita e parë ka nisur një betejë sistematike kundër industrisë që për vite të tëra është zgjeruar pa kontroll. Qëllimi ynë është vendosja e një sistemi të përgjegjshëm, transparent dhe të kontrolluar, me rregulla të qarta, siguri juridike dhe mbrojtje shumë më të madhe për qytetarët. Kjo është betejë për të ardhmen e të rinjve, për sigurinë e familjeve dhe për dinjitetin e shoqërisë”, përfundoi Azizi.
