Fillon protesta e sindikatës

Punëtorë dhe përfaqësues sindikatash janë mbledhur sot në rrugët e kryeqytetit për të shënuar 1 Majin – Ditën Ndërkombëtare të Punës – me një protestë që kërkon paga më të larta, kushte më të mira pune dhe më shumë siguri sociale.

Me pankarta në duar dhe thirrje për dinjitet, protestuesit po marshojnë në qendër të qytetit, duke theksuar se kostoja e jetesës është rritur ndjeshëm, ndërsa pagat kanë mbetur të ulëta dhe të pamjaftueshme për të përballuar shpenzimet mujore.

Përfaqësuesit e sindikatave deklarojnë se punëtorët nuk mund të vazhdojnë të jetojnë me paga minimale, ndërsa kërkojnë rritje urgjente të pagës minimale, respektim të të drejtave të punëtorëve dhe masa konkrete për përmirësimin e standardit jetësor.

“Punëtorët meritojnë dinjitet, jo mbijetesë”, është një nga mesazhet kryesore që po dëgjohet nga protesta.

Organizatorët paralajmërojnë se nëse kërkesat e tyre nuk merren parasysh nga institucionet, do të pasojnë forma të tjera të presionit sindikal në ditët në vijim.

Protesta po zhvillohet pa incidente, ndërsa prania e policisë është e shtuar për të garantuar rendin dhe sigurinë.