Zgjedhjet lokale pritet të shpallen të shtunën nga Kryeparlamentari Gashi
Kryeparlamentari Afrim Gashi, do të shpallë zgjedhjet e teta lokale që nga pavarësia e Maqedonisë të shtunën, më 9 gusht, kanë konfirmuar nga Kuvendi për gazetën “Sloboden Peçat”.
Rrethi i parë i garës për kryetarë komunash dhe këshilltarë do të mbahet më 19 tetor, ndërsa Rrethi i dytë do të jetë më 2 nëntor në komunat për të cilat kryetarët e komunave nuk do të zgjidhen në rrethin e parë. Fushata për zgjedhjet lokale do të fillojë 20 ditë para heshtjes zgjedhore, pra më 28 shtator.
Sipas praktikës së mëparshme, gjatë asaj periudhe Kuvendi pritet të mos mbajë seanca plenare dhe komisionesh në mënyrë që partitë të mos e keqpërdorin platformën parlamentare për fushatë zgjedhore.
Komisioni Shtetëror i Zgjedhjeve (KSHZ) do të përcaktojë afatet më të rëndësishme për aktivitetet zgjedhore në një seancë publike në të njëjtën ditë kur shpallen zgjedhjet, pra më 9 gusht.
Të sëmurët, të pafuqishmit dhe të burgosurit do të votojnë një ditë para votimit, pra më 18 tetor. Partitë, kandidatët për kryetarë komunash dhe këshilltarë duhet t’i regjistrojnë ato në Komisionet Komunale Zgjedhore jo më vonë se 35 ditë para zgjedhjeve.
