Vritet në sallë të gjykatës gjyqtari Astrit Kalaja, motivi ishte për pronë
Gjyqtari i Gjykatës së Apelit në Tiranë Astrit Kalaja është vrarë nga një person për pronë. Autori, Ervis Shkëmbi, ka pranuar përpara hetuesve se e kreu krimin për shkak të një çështjeje pronësie që po humbiste në gjykatë dhe kështu, i irrituar, kishte hyrë me armë në sallën e gjykatës dhe kishte vrarë në vend gjyqtarin dhe kishte plagosur edhe dy persona të tjerë, babë e bir, Rakip dhe Ervis Kurtaj, të cilët ndodhen në Spitalin e Traumës dhe janë jashtë rrezikut për jetën.
30 vjeçari dyshohet se vrau gjyqtarin derisa ishte duke shqyrtuar një proces gjyqësor për pronën e pretenduar nga familja e autorit.
Sipas burimeve nga policia, autori është arrestuar menjëherë në vendngjarje dhe arma e përdorur është sekuestruar. Megjithatë, mbetet e paqartë sesi 30-vjeçari ka mundur të hyjë i armatosur në një institucion të sigurisë së lartë, ku në hyrje ndodhen detektorë metalikë dhe kontrolle sigurie.
Sipas dëshmive të mëparshme publike, konflikti për pronën mes familjes Shkëmbi dhe palës tjetër kishte nisur vite më parë, në zonën e Shkodrës. Babai i autorit, Gjon Shkëmbi pretendonte se prona i ishte uzurpuar, dhe rasti kishte kaluar në disa shkallë të sistemit gjyqësor. Në gjykatën e Shkallës së Parë, familja Shkëmbi kishte fituar, por Gjykata e Apelit, ku procesi po shqyrtohej sërish nga Astrit Kalaja, e kishte kthyer çështjen për rigjykim, për shkak të mungesës së disa dokumenteve në dosje.
Ervis Shkëmbi e kishte denoncuar më parë rastin edhe në një emision investigativ, duke akuzuar për zvarritje dhe manipulime nga pala tjetër. Gjyqi i së hënës besohet të ketë qenë vendimtar për çështjen, çka sipas autoriteteve mund të ketë shërbyer si motiv për aktin ekstrem të dhunës.
Prokuroria ka nisur një hetim të thelluar për ngjarjen, përfshirë verifikimin e masave të sigurisë në gjykatë, si dhe rolin e personave të tjerë të pranishëm në sallë.
