VLEN: BDI dhe Bujar Osmani të përgjigjen për lidhjet me Stajiqin

Partia VLEN ka reaguar ndaj akuzave të BDI-së për ndikim serb, duke pretenduar se pikërisht BDI-ja ka pasur kontakte dhe bashkëpunime me figura të lidhura me Serbinë. Në reagimin e tyre, nga VLEN përmendin iniciativën “Ballkani i Hapur”, çështjet që lidhen me Ohrin dhe Shën Naumin, si dhe emrin e Vlladimir Stajiqit, konsull nderi i Serbisë në Maqedoninë e Veriut, për të cilin thonë se ka qenë i pranishëm në pritje zyrtare të organizuara gjatë kohës kur Bujar Osmani ushtronte funksione të larta shtetërore.

“VLEN kërkon që Osmani të sqarojë publikisht raportet e tij me Stajiqin, duke pyetur se kush e ftoi atë në aktivitetet zyrtare dhe çfarë marrëdhënie kishte me të gjatë periudhës së kryesimit të OSBE-së nga Maqedonia e Veriut. Sa më shumë që BDI përpiqet të flasë për ndikim serb, aq më shumë i dalin përpara gjurmët e veta. Ballkani i Hapur, Ohri, Shën Naumi dhe tani edhe Vlladimir Stajiq, konsulli i nderit i Serbisë në pritjet zyrtare të Bujar Osmanit.

Prandaj, zhurma nuk u kryen punë. Tani le të dalin dhe të përgjigjen për Stajiqin, për fotografitë e për allashverishet që po u dalin në shesh. Bujar Osmani duhet të përgjigjet qartë. Kush është Vlladimir Stajiq për Bujar Osmanin? Pse, në kohën kur Bujar Osmani krekosej me kryesimin e OSBE-së, Stajiqi ishte në pritje zyrtare si konsull i nderit i Serbisë në Maqedoninë e Veriut? Kush e ftoi? Çfarë raporti kishte me të? Shqiptarët meritojnë ta dinë të vërtetën.