Satoshi Nakamoto tani më i pasur se Bill Gates
Personazhi enigmatik prapa Bitcoin, i njohur si Satoshi Nakamoto, besohet se tashmë ka arritur të tejkalojë pasurinë e themeluesit të Microsoft, Bill Gates. Vlerësimet e fundit tregojnë se portofoli i Bitcoin që i përket Nakamotos përbëhet nga rreth 1.1 milion monedha, të cilat nuk kanë lëvizur që nga viti 2010.
Në datën 14 korrik 2025, çmimi i Bitcoin arriti mbi 123.000 dollarë për monedhë, duke bërë që pasuria e Nakamotos të vlerësohej në rreth 135 miliardë dollarë. Kjo shifër e vendos menjëherë përpara pasurisë së Bill Gates, e cila sipas Forbes, në maj të vitit 2025 ishte rreth 115,1 miliardë dollarë. Raportime të tjera nga Arkham Intelligence dhe Finbold e vlerësojnë pasurinë e Nakamotos në 133,5 miliardë dollarë, krahasuar me 118,7 miliardë dollarë të Gates.
Ky ndryshim e ka futur Nakamoton mes njerëzve më të pasur në botë, një arritje e jashtëzakonshme për një figurë që nuk dihet nëse është një individ apo një grup personash.
Kush është Satoshi Nakamoto?
Identiteti i Satoshi Nakamotos mbetet një nga misteret më të mëdha të epokës digjitale. Ai, ajo, ose ata u shfaqën për herë të parë më 31 tetor 2008, kur publikuan dokumentin (“whitepaper”) Bitcoin: A Peer-to-Peer Electronic Cash System, që shpjegonte një sistem të ri financiar të decentralizuar.
Në janar 2009, Nakamoto hodhi në qarkullim versionin e parë të softuerit Bitcoin dhe nxori bllokun e parë të blockchain-it, i njohur si Genesis Block.
Midis viteve 2009 dhe 2010, Nakamoto minoi rreth 1,1 milion BTC. Pas prillit 2011, komunikimet e tij publike ndaluan dhe identiteti u zhduk plotësisht. Që atëherë, monedhat e tij nuk janë prekur kurrë, gjë që ka ushqyer teori të shumta: disa mendojnë se Nakamoto është një gjeni i vetmuar, të tjerë dyshojnë se mund të jetë një grup programuesish të lidhur me kriptografinë dhe financat.
Nëse ky ritëm i rritjes së Bitcoin vazhdon, pasuria e Nakamotos mund ta vendosë atë shumë shpejt në krye të listës së miliarderëve globalë, një arritje ironike për dikë që mund të mos e synonte kurrë pasurinë, por të ndryshonte sistemin financiar botëror./VOXAL/
