Osmani shpërndan Kuvendin e Kosovës, vendi shkon në zgjedhje të reja
Presidentja e Kosovës, Vjosa Osmani, ka nënshkruar dekretin për shpërbërjen e Kuvendi i Kosovës, pasi deputetët nuk arritën të zgjedhin presidentin e shtetit brenda afatit kushtetues.
Në një deklarim publik, Osmani kritikoi ashpër veprimet e deputetëve, duke theksuar se ata dështuan të vendosin interesin e qytetarëve mbi interesat politike, duke e çuar vendin drejt zgjedhjeve të reja.
“Përfaqësuesit e popullit mbrëmë vendosën që ta dërgojnë vendin në zgjedhje të reja. Kjo situatë ka qenë plotësisht e evitueshme. Është fatkeqësi e madhe për këtë shtet që ata nuk zgjodhën interesin e Republikës së Kosovës”, deklaroi Osmani.
Ajo theksoi se vendimi për shpërndarjen e parlamentit është një veprim i qartë kushtetues. Sipas saj, mandati presidencial përfundon më 4 prill, ndërsa 5 marsi ishte afati i fundit për zgjedhjen e presidentit nga deputetët.
“Deputetët e kuvendit kanë pasur në dispozicion 23 ditë për ta kryer këtë detyrë. Ata vendosën të mos e bëjnë dhe ky është realiteti me të cilin po përballemi sot. Kam vendosur të shpërndaj kuvendin dhe të shpall zgjedhje të reja”, tha Osmani.
Presidentja shtoi se qytetarët nuk kanë kërkuar zgjedhje të reja, por situata është krijuar si pasojë e dështimit të parlamentit.
“Këtu e sollën vendin njerëz të papërgjegjshëm dhe me qëllime të rrezikshme”, përfundoi ajo.
Si erdhi deri te kriza institucionale
Kriza politike u thellua pas seancës së mbajtur në orët e vona të 5 marsit, kur në sallën e Kuvendi i Kosovës ishin të pranishëm vetëm 66 deputetë, ndërsa 54 munguan në votimin për rundin e parë të zgjedhjes së presidentit të Republikës së Kosovës.
Kryetarja e Kuvendit, Albulena Haxhiu, njoftoi se për vazhdimin e procedurës kërkohej prania e të paktën 80 deputetëve, duke e ndërprerë seancën për shkak të mungesës së kuorumit.
Në këtë proces, Lëvizja Vetëvendosje kishte nominuar Mulhaxha Kollçakun si kundërkandidat për Glauk Konjufca në garën për president të Kosovës.
Në të njëjtën mbrëmje u mbajt edhe një seancë e jashtëzakonshme, ku u hodhën në votim amendamentet për ndryshimin e mënyrës së zgjedhjes së presidentit – nga Kuvendi te zgjedhja e drejtpërdrejtë nga qytetarët – por këto propozime nuk arritën të sigurojnë votat e nevojshme.
Pas dështimit të seancës, kryetarja e Kuvendit njoftoi se institucioni i është drejtuar edhe Gjykata Kushtetuese e Kosovës për të kërkuar vlerësimin e kushtetutshmërisë së procedurës për zgjedhjen e presidentit.
Ndërkohë, data e zgjedhjeve të reja parlamentare pritet të caktohet pas konsultimeve të presidentes me partitë politike.
