Një vit nga tragjedia në Koçan: “63 karrige të bardha – 63 jetë” në kujtim të viktimave

Me vendosjen e instalacionit simbolik “63 karrige të bardha – 63 jetë”, sot në Parkun e Revolucionit në Koçan ka nisur shënimi i përvjetorit të tragjedisë së madhe nga zjarri në kabarenë “Puls”, ku më 16 mars të vitit të kaluar humbën jetën 63 persona, ndërsa mbi 200 të tjerë u plagosën.

Në hapësirën e parkut janë vendosur 63 karrige të bardha, ndërsa mbi secilën prej tyre është vendosur nga një trëndafil i bardhë në shenjë kujtimi për viktimat.

“63 karrige të bardha, 63 emra, 63 jetë që mungojnë – çdo karrige mban heshtjen e një pranie që nuk është më. Një trëndafil i bardhë për kujtim, një dritë për përkujtim dhe një vend që nuk do të mbushet kurrë”, është mesazhi me të cilin familjarët e viktimave i pritën të pranishmit para Shtëpisë së Kulturës në Koçan.

Ngjarja, e organizuar nga Komuna e Koçanit dhe prindërit e viktimave, nisi në orën 08:45 dhe është pjesë e programit qendror për shënimin e përvjetorit të tragjedisë.

Para aktivitetit përkujtimor “Dita e Kujtesës – 16 Mars 2025”, i cili do të mbahet në orën 10:30 në Qendrën e Kulturës “Beli Mugri”, para këtij monumenti simbolik kushtuar ëndrrave të papërfunduara të të rinjve që humbën jetën, është hapur edhe një libër ngushëllimesh për vizitorët dhe delegacionet.

Dhimbja dhe kujtimi për tragjedinë që tronditi Koçanin dhe gjithë vendin u ndjenë që në orët e para të mëngjesit. Qytetarë dhe familjarë u mblodhën në heshtje për të përkujtuar viktimat.

Tubimi, i organizuar nga Shoqata e Qytetarëve “16 Mars 2025 Koçan”, nisi simbolikisht në orën 02:15 para objektit ku ndodhej kabareja “Puls”.

Në 02:32, me qirinj në duar dhe me një minutë heshtje, të pranishmit u përkulën para kujtimit të viktimave të zjarrit tragjik.

Gjatë ditës, në Qendrën e Kulturës “Beli Mugri” do të mbahet edhe një ngjarje komemorative në kujtim të viktimave të tragjedisë në Koçan, ndërsa gjatë fundjavës përvjetori u shënua edhe me disa aktivitete të tjera përkujtimore.