Një i vdekur dhe tre të lënduar në Shkup
Një aksident i rëndë ka ndodhur mëngjesin e sotëm (24.04.2026) në një kantier ndërtimi në rrugën “Kozjak”, në komunën e Kisella Vodë në Shkup, ku një punëtor ka humbur jetën dhe tre të tjerë janë lënduar rëndë pasi janë zënë nga dheu gjatë punimeve.
Sipas informacioneve nga SPB Shkup, rasti është denoncuar në ora 08:17, kur gjatë gërmimit të themeleve tre punëtorë janë mbuluar nga dheu. Menjëherë janë aktivizuar ekipet e shpëtimit, të cilat në bashkëpunim me Qendrën për Menaxhim me Kriza dhe Brigadën e Zjarrfikësve kanë ndërhyrë për nxjerrjen e tyre.
Dy prej punëtorëve janë nxjerrë relativisht shpejt dhe janë transportuar me urgjencë në Klinikën “Nënë Tereza”, ku po marrin trajtim intensiv. Ndërkohë, për nxjerrjen e punëtorit të tretë është zhvilluar një operacion më i gjatë dhe më kompleks.
Shefi i turnit në Ndihmën e Shpejtë – Shkup, doktor Dragan Panov, bëri të ditur për MIA-n se njëri nga punëtorët nuk ka arritur t’u mbijetojë plagëve. Sipas tij, të lënduarit janë të moshës 35 deri në 45 vjeç, ndërsa viktima është rreth 34 vjeç. Në intervenim kanë marrë pjesë katër autoambulanca.
Në vendngjarje ndodhen policia, ekipet mjekësore dhe zjarrfikësit, ndërsa autoritetet kanë nisur hetimet për të zbardhur shkaqet e aksidentit dhe për të verifikuar nëse janë respektuar masat e sigurisë në punë.
