Mjekët do të mund të vazhdojnë të punojnë deri në 70 vjeç dhe të marrin pension

Ministria e Shëndetësisë e Maqedonisë së Veriut ka përgatitur një sërë ndryshimesh dhe plotësimesh në Ligjin për mbrojtje shëndetësore, të cilat këtë javë janë publikuar në Regjistrin Kombëtar Elektronik të Rregulloreve. Të gjitha palët e interesuara kanë mundësi të paraqesin sugjerime dhe komente, të cilat do të shqyrtohen sipas procedurës përkatëse.

Ministri i Shëndetësisë, Azir Aliu, theksoi se procesi udhëhiqet nga parimet e transparencës dhe llogaridhënies. Sipas tij, përvoja nga zbatimi i deritanishëm i ligjit ka treguar nevojën për ndryshime në procedurat e punësimit të punonjësve shëndetësorë, statusin e drejtorëve të institucioneve publike shëndetësore, specializimet dhe kushtet e pensionimit.

Një nga risitë më të rëndësishme është vendosja e punësimit me prioritet për mjekët e rinj që diplomojnë me rezultatet më të larta në fakultetet e mjekësisë në vend. Nëse ata aplikojnë për një vend pune në një institucion publik shëndetësor, nuk do t’i nënshtrohen procedurës standarde të përzgjedhjes, por do të punësohen drejtpërdrejt me prioritet.

Ndryshimet parashikojnë edhe mënyrë të re për përzgjedhjen e kandidatëve për punë. Përbërja e komisionit të seleksionimit do të propozohet nga kolegjiumi profesional i institucionit për çdo vend pune veçmas, ndërsa drejtori do të jetë i detyruar të punësojë kandidatin më të mirë të renditur.

Reformat përfshijnë gjithashtu planifikim të ri për kuadrot specialistike dhe subspecialistike. Përveç programeve shtetërore dhe bashkëfinancuese për specializime, në të ardhmen do të miratohen edhe programe që do të përcaktojnë numrin e specializimeve private, në përputhje me nevojat reale për personel mjekësor.

Një tjetër ndryshim i rëndësishëm është rritja e kufirit të moshës për angazhimin e mjekëve me përvojë në fushat ku ka mungesë të kuadrit. Ata do të mund të punojnë me kontratë nga mosha 67 deri në 70 vjeç në institucionet shëndetësore dhe njëkohësisht të vazhdojnë të marrin pension.

Angazhimi i tyre do të bëhet me pëlqimin e Ministrisë së Shëndetësisë dhe të Fondi për Sigurim Shëndetësor i Maqedonisë së Veriut, në rastet kur nuk ka mënyrë tjetër për të siguruar shërbime të caktuara shëndetësore ose për funksionim normal të sistemit. Ndryshimet synojnë të përmirësojnë menaxhimin e burimeve njerëzore në shëndetësi dhe të adresojnë mungesën e specialistëve në disa fusha.VOXAL