Më shumë se 4.500 qytetarë kanë aplikuar për masat e vetëpunësimit
Më shumë se 4.500 qytetarë të papunë kanë aplikuar për fondet e qeverisë për vetëpunësim, njoftoi sot Ministri i Ekonomisë dhe Punës, Besar Durmishi.
Masat aktive të punësimit për vitin 2025, për të cilat qeveria investoi një shifër rekord prej 40 milionë eurosh, kanë zgjuar interes të madh te qytetarët.
“Ky nuk është vetëm plan në letër – kjo është një mundësi reale për mbi 10.000 persona të gjejnë vend të denjë pune, mbështetje për biznesin e tyre ose trajnim në terren. Sipas informacioneve të fundit që i kam në dispozicion, janë parashtruar mbi 4.500 aplikime, gjë që tregon besim të madh në masat dhe gatishmërinë e qytetarëve për të ndërmarrë iniciativën”, deklaroi ministri Durmishi.
Theks i veçantë iu kushtua Masës 3.1 – Trajnimi te punëdhënës i njohur, një nga format më të drejtpërdrejta të përgatitjes për punësim. Përmes kësaj mase:
– punëdhënësit kanë mundësinë të trajnojnë të punësuarit e ardhshëm sipas nevojave të tyre,
– personat e papunë përvetësojnë shkathtësi konkrete praktike në mjedis real të punës,
– krijohet mundësi për punësim afatgjatë pas përfundimit të trajnimit.
“Masa 3.1 është urë lidhëse midis të papunëve dhe punëdhënësve. Ajo ofron përfitim të dyanshëm – kompanitë bëhen me staf të trajnuar, ndërsa qytetarët fitojnë shansin për punë të qëndrueshme”, tha Durmishi.
Me Planin operativ, ministri përkujtoi se janë aktive edhe masat e vetëpunësimit, ku është veçanërisht i madh interesi i të rinjve deri në moshën 29 vjeç, për çka kanë mbërritur më shumë se 3.000 aplikime.
Masa 1.1: Deri në 7.000 euro për biznes për personat mbi 29 vjeç,
Masa 1.2: Deri në 10.000 euro për të rinjtë deri në 29 vjeç me ide novatore,
Masa 1A: Deri në 20.000 EUR për bizneset e përbashkëta të së paku dy personave.
Përmes prezantimeve në terren, Ministria e Ekonomisë dhe Punës, së bashku me Agjencinë e Punësimit, synojnë të informojnë drejtpërdrejt qytetarët dhe t’i inkurajojnë që të aplikojnë. Pas Çairit, ku interesi ishte veçanërisht i lartë, vijojnë vizitat në Gostivar, Kërçovë, Saraj, Likovë dhe komuna të tjera me shkallë më të lartë të papunësisë.
“Qytetarët duhet ta dinë se Qeveria qëndron pas tyre. Këto nuk janë vetëm shifra – këto janë shanse reale për një jetë më të mirë. Qëndroni këtu, zhvilloni idenë tuaj – ne do të jemi partnerë në atë proces”, porositi ministri Durmishi.
