Kolona para pompave: qytetarët nxitojnë të mbushin rezervuarët për të kursyer rreth 700 denarë

Kolona të gjata automjetesh janë krijuar para pompave të karburantit pasi Komisioni Rregullator për Energjetikë vendosi që nga mesnata të rriten çmimet e derivateve të naftës. Sipas vendimit, çmimi i dizelit do të rritet për 14,5 denarë për litër, ndërsa benzina do të shtrenjtohet për 5 denarë për litër.

Menjëherë pas publikimit të vendimit, shumë qytetarë nxituan drejt pompave për të furnizuar automjetet e tyre me karburant me çmimet aktuale, para se të hyjnë në fuqi çmimet e reja. Para disa pompave në Shkup janë krijuar radhë të gjata automjetesh.

Rritja e çmimeve pritet të ndikojë dukshëm në shpenzimet e vozitësve. Duke marrë parasysh se rezervuari mesatar i një veture mban rreth 40 deri në 60 litra karburant, mbushja e tij pas mesnate do të kushtojë dukshëm më shumë.

Për shembull, për 50 litra eurodizel, pas mesnate do të duhet të paguhen rreth 4.275 denarë, që është rreth 725 denarë më shumë se sa nëse i njëjti rezervuar mbushet sot para hyrjes në fuqi të çmimeve të reja.

Te veturat me motorë benzine situata është pak më e favorshme, por edhe aty ka rritje të kostos. Një rezervuar i plotë me eurosuper 98 sipas çmimeve të reja do të kushtojë rreth 4.075 denarë, që është rreth 250 denarë më shumë se më parë.

Sipas vendimit të Komisionit Rregullator për Energjetikë, nga mesnata çmimi i EUROSUPER BS-95 do të jetë 79,5 denarë për litër, EUROSUPER BS-98 do të shitet për 81,5 denarë, ndërsa EURODIZEL BS (D-E V) do të kushtojë 85,5 denarë për litër.VOXAL