Greqia gati të bllokojë rrjetet sociale për fëmijët nën 15 vjeç
Greqia duket se është gati të shpallë një “bllokim” të përdorimit të mediave sociale për fëmijët nën 15 vjeç.
Sipas një burimi të lartë qeveritar të cituar nga Reuters, vendi fqinj është “shumë afër” shpalljes së ndalimit.
Duhet theksuar se shtatorin e kaluar, Kryeministri Kyriakos Mitsotakis, gjatë një eventi me temë “Mbrojtja e Fëmijëve në Epokën Dixhitale”, në kuadër të Javës së Nivelit të Lartë të Asamblesë së 80-të të Përgjithshme të OKB-së, iu referua nevojës për veprime globale për të mbrojtur fëmijët nga përdorimi i pakontrolluar i mediave sociale. Në atë kohë, Kryeministri theksoi se Greqia është gati të shqyrtojë madje edhe ndalimin e përdorimit të saj në mosha të caktuara.
Spanja njoftoi sot se planifikon të ndalojë mediat sociale për personat nën 16 vjeç dhe do të miratojë një ligj që do t’i bëjë udhëheqësit e mediave sociale personalisht përgjegjës për gjuhën e urrejtjes në platformat e tyre.
Në të njëjtën kohë, parlamenti francez javën e kaluar miratoi një projektligj që ndalon mediat sociale për të miturit nën 15 vjeç. Portugalia po përgatitet të bëjë të njëjtën gjë , pasi një projektligj i është paraqitur Parlamentit për të ndaluar përdorimin e tyre nga fëmijët nën 16 vjeç.
