BE vendos objektivin e vitit 2027 për sistemin anti-dron për t’u mbrojtur nga Rusia
Shefja e politikës së jashtme të BE-së, Kaja Kallas, ka thënë se një sistem i ri kundër dronëve duhet të jetë “plotësisht funksional deri në fund të vitit 2027”, si pjesë e një përpjekjeje për të forcuar mbrojtjen kundër Rusisë dhe për t’u përgatitur plotësisht për konflikt të mundshëm deri në vitin 2030, ka raportuar BBC.
“Dronët tashmë po e ripërcaktojnë luftën. Të kesh mbrojtje nga dronë nuk është më opsionale për askënd”, tha Kallas, duke iu referuar luftës së vazhdueshme të Rusisë në Ukrainë dhe frikës se Moska mund të sulmojë BE-në.
“Udhërrëfyesi i mbrojtjes” i Komisionit Evropian propozon gjithashtu forcimin e kufijve lindorë të BE-së dhe ndërtimin e “mburojave” ajrore dhe hapësinore.
Disa vende të BE-së janë përballur me ndërhyrje ruse në hapësirën e tyre ajrore dhe Presidenti i SHBA-së, Donald Trump, i ka kërkuar bllokut të bëjë më shumë për të mbrojtur veten.
Plani i mbrojtjes evropiane vjen mes frikës në rritje të Evropës se Rusia do të vazhdojë agresionin e saj drejt perëndimit pasi të mbarojë lufta në Ukrainë, si dhe paqartësisë së vazhdueshme mbi angazhimin afatgjatë të Trump ndaj sigurisë evropiane.
“Rreziku nuk do të zhduket as kur të mbarojë lufta në Ukrainë. Është e qartë se duhet të forcojmë mbrojtjen tonë kundër Rusisë”, u tha Kallas gazetarëve në Bruksel të enjten.
Edhe pse duket se ka pak shanse që lufta të mbarojë së shpejti, Trump thotë se tani po zhvillon një bisedë “të gjatë” me Presidentin rus Vladimir Putin në telefon, përpara bisedimeve me Presidentin ukrainas Volodymyr Zelensky të premten.
Trump ka lënë të kuptohet se nëse Putin nuk ndërmerr hapa për t’i dhënë fund luftës, SHBA-të mund t’i dërgojnë Ukrainës raketa Tomahawk me rreze të gjatë veprimi – një veprim i mundshëm i përshkruar tashmë si “përshkallëzim” nga Kremlini.
Duke qëndruar përkrah Kallas, Komisioneri Evropian i Mbrojtjes Andrius Kubilius theksoi se “udhërrëfyesi ynë tregon të gjitha pikat kryesore për të arritur gatishmërinë e mbrojtjes deri në vitin 2030, në mënyrë që të mund të pengojmë agresionin rus, të parandalojmë luftën dhe të ruajmë paqen”.
Putin ka mohuar vazhdimisht se Moska ka ndonjë plan agresiv ndaj BE-së. Në qershor, ai tha se “miti se Rusia po planifikon të sulmojë Evropën, vendet e NATO-s është një gënjeshtër e pabesueshme… pa kuptim”.
Komisioni ekzekutiv i BE-së tha se unioni me 27 anëtarë duhet të jetë gati deri në vitin 2030 për t’iu “përgjigjur çdo krize, përfshirë konfliktin me intensitet të lartë”.
Ai gjithashtu i kërkoi bllokut të “mbyllë boshllëqet kritike të aftësive” – duke përfshirë mbrojtjen ajrore dhe raketore, si dhe sistemet e artilerisë – “përmes zhvillimit dhe prokurimit të përbashkët”.
Shumë vende të BE-së janë gjithashtu anëtare të NATO-s dhe shefi i saj, Mark Rutte, tha se po punonin së bashku për të mbrojtur shtetet anëtare në krahun lindor nga kërcënimi ajror.
BE theksoi se projektet e saj “kryesore” do të zhvilloheshin në “bashkëpunim të ngushtë” me NATO-n dhe nuk do të dyfishonin punën e aleancës mbrojtëse perëndimore.
Nuk u dhanë vlerësime për koston e përgjithshme, por Kubilius tha se “nuk po flasim këtu për qindra miliarda”.
