Trump kërcënon me tarifa të reja – A është Maqedonia në listë?
Presidenti i Shteteve të Bashkuara, Donald Trump, njoftoi se do të vendosë tarifa shtesë prej 10% për çdo shtet që i bashkohet politikave të grupit BRICS, të cilat janë vlerësuar si “anti-amerikane”. Kjo deklaratë vjen në prag të 9 korrikut, afatit për përfundimin e marrëveshjeve tregtare, ndërkohë që Shtëpia e Bardhë po dërgon letra doganore në dhjetëra shtete. Ende nuk është e qartë nëse Maqedonia do të marrë një letër të tillë, edhe pse ka hequr tarifat për produktet amerikane.
Presidenti amerikan Donald Trump, të dielën, kërcënoi me vendosjen e tarifave të reja për çdo vend që mbështet, siç i quajti ai, “politikat anti-amerikane” të grupit të vendeve në zhvillim BRICS, në një kohë kur administrata e tij ka nisur të dërgojë letra doganore në dhjetëra shtete anembanë botës, raporton CNN.
Në një postim në platformën Truth Social, Trump njoftoi se SHBA do të vendosë tarifë shtesë prej 10% për çdo shtet që harmonizohet me politikat e BRICS-it, pa asnjë përjashtim. Ai nuk specifikoi se cilat politika i konsideron si “anti-amerikane”.
BRICS, që përfshin Brazilin, Rusinë, Indinë, Kinën dhe Afrikën e Jugut, prej kohësh promovon një rend botëror multipolar si alternativë ndaj rendit perëndimor dominues. Kohët e fundit, grupit i janë bashkuar edhe Egjipti, Etiopia, Indonezia, Irani dhe Emiratet e Bashkuara Arabe, ndërsa ka edhe dhjetëra shtete partnere në nivel më të ulët, përfshirë Bjellorusinë, Nigerinë, Tajlandën dhe Vietnamin.
Në deklaratën e përbashkët të samitit të BRICS-it në Rio de Zhaneiro më 6 korrik, liderët e grupit shprehën “shqetësim serioz” për “përdorimin gjithnjë e më të madh të masave të njëanshme doganore dhe jotarifore” – që konsiderohet si kritikë e drejtpërdrejtë ndaj politikave tregtare të Trump-it.
Trump konfirmoi se, duke filluar nga 7 korriku, SHBA do të fillojë dërgimin e të ashtuquajturave “letra doganore” drejt dhjetëra vendeve, përpara përfundimit të periudhës 90-ditore të pezullimit të tarifave më 9 korrik. Ai shtoi se letrat do të vazhdojnë të dërgohen edhe të martën dhe të mërkurën dhe pret që deri më 9 korrik shumica e vendeve të mbulohen ose me marrëveshje, ose me letër.
“Letrat dhe/ose marrëveshjet me vende të ndryshme nga mbarë bota do të fillojnë të dërgohen nga e hëna në mesditë”, shkroi Trump në Truth Social.
Sekretari amerikan i Thesarit, Scott Bessent, paralajmëroi se tarifat do të rikthehen në nivelin e muajit prill, nëse shtetet nuk arrijnë marrëveshje. Ai shtoi se administrata do të ushtrojë “presion maksimal” për arritjen e marrëveshjeve.
Bessent theksoi se rreth 100 letra do t’u dërgohen “vendeve të vogla me të cilat SHBA nuk ka tregti të madhe”, ku tarifa bazë prej 10% tashmë është në fuqi. Ai sqaroi se nuk do të vendosen tarifa prej 70% për partnerët e mëdhenj tregtarë.
Deri tani, SHBA ka arritur tre marrëveshje tregtare: me Mbretërinë e Bashkuar (tarifë 10%), me Kinën (ulje e përkohshme nga 145% në 30%) dhe me Vietnamin (minimum 20% tarifë).
Për Maqedoninë, më 2 prill – që Trump e ka quajtur “Dita e Çlirimit” – u paralajmërua një nga tarifat më të larta në rajon, me 10% tarifë bazë dhe 23% tarifë reciproke, duke arritur një normë totale prej 33%.
Kryeministri Hristijan Mickoski e quajti këtë një gabim ose informacion të pasaktë. Ministri për Punë të Jashtme dhe Tregti të Jashtme, Timço Mucunski, më pas pati takim me sekretarin amerikan të Shtetit, Marco Rubio, në Uashington, ku thuhet se është bërë përparim lidhur me çështjen e tarifave për Maqedoninë.
Qeveria e Maqedonisë më pas mori vendim për heqjen e tarifave për të gjitha produktet që importohen nga SHBA. Megjithatë, mbetet e paqartë nëse vendi do të marrë një nga letrat doganore të paralajmëruara nga Trump.
