Hamasi dorëzon trupin e radhës, besohet se është ushtari i marrë peng para 11 vitesh

Të dielën e 9 nëntorit, Izraeli mori mbetjet e një pengu në Gaza, për të cilin Hamasi tha se ishte trupi i një ushtari izraelit të vrarë në vitin 2014 dhe të mbajtur për 11 vjet. Mbetjet e tij ishin të vetmet që kishin mbetur në Gaza përpara luftës aktuale mes Izraelit dhe Hamasit.

Hamasi tha se i gjeti mbetjet e ushtarit Hadar Goldin në një tunel në qytetin më jugor të Rafah-ut të shtunën. Goldin u vra më 1 gusht 2014, dy orë pasi hyri në fuqi një armëpushim në luftën e atij viti mes Izraelit dhe “Izraeli beson se mbetjet që kemi tani në duar janë të togerit Hadar Goldin,” tha zëdhënësja e qeverisë izraelite, Shosh Bedrosian, por theksoi se nevojitet edhe një konfirmim mjeko-ligjor. Ky mund të vijë brenda disa orëve, shkruan Associated Press.

Kthimi i mbetjeve të trupit të Goldin-it, i cili është kthyer në një simbol kombëtar, do të ishte një zhvillim i rëndësishëm në armëpushimin e ndërmjetësuar nga SHBA-të, i cili ka hasur vështirësi për shkak të kthimit të ngadaltë të trupave të pengjeve dhe përleshjeve mes trupave izraelite dhe militantëve në Gaza. Kjo gjithashtu do të mbyllte një kapitull të dhimbshëm për familjen e tij.

Kryqi i Kuq e transferoi trupin te ushtria izraelite brenda Gazës. Ai u dërgua në Institutin Kombëtar të Mjekësisë Ligjore në Tel Aviv. Dhjetëra njerëz u mblodhën përgjatë kryqëzimeve ku kalonte autokolona policore që transportonte mbetjet, duke mbajtur flamuj izraelitë dhe duke i dhënë lamtumirën e fundit.

Nëse mbetjet identifikohen si të Goldin-it, trupat e katër pengjeve të tjera do të mbeten ende në Gaza.

Kryeministri Benjamin Netanyahu tha në mbledhjen javore të kabinetit se mbajtja e trupit për kaq gjatë ka shkaktuar një “dhimbje të madhe për familjen e tij, e cila tani do të mund t’i bëjë një varrim hebre.”

Kthimi i të rënëve izraelitë në atdhe

Familja e Goldin-it udhëhoqi një fushatë publike, së bashku me familjen e një ushtari tjetër, trupi i të cilit u mor në vitin 2014, për t’i kthyer djemtë e tyre për t’i varrosur. Izraeli i rikuperoi mbetjet e ushtarit tjetër, Oron Shaul, më herët këtë vit.

Netanyahu tha se vendi do të vazhdojë përpjekjet për të kthyer trupat e izraelitëve që ende mbahen përtej vijave të armikut, si Eli Cohen, spiuni izraelit i varur në Damask në vitin 1965.

Mediat izraelite, duke cituar zyrtarë anonimë, raportuan më parë se Hamasi po vononte lirimin e trupit të Goldin-it me shpresën për të negociuar një kalim të sigurt për më shumë se 100 militantë të rrethuar nga forcat izraelite dhe të bllokuar në Rafah.

Gila Gamliel, ministre e inovacionit, shkencës dhe teknologjisë dhe anëtare e partisë Likud të Netanyahu-t, tha për radion ushtarake se Izraeli nuk po negocion për një “marrëveshje brenda marrëveshjes.”

“Ka marrëveshje, zbatimi i të cilave garantohet nga ndërmjetësuesit, dhe nuk duhet të lejojmë askënd që tani të luajë (lojëra) dhe të rihapë marrëveshjen,” tha ajo.

Hamasi nuk bëri asnjë koment mbi një shkëmbim të mundshëm për luftëtarët e tij të bllokuar në zonën e quajtur “zona e verdhë”, e cila kontrollohet nga forcat izraelite, megjithëse ata pranuan se atje po ndodhin përleshje.